香港。
對我嚟講，香港哩個地方，可以講話係熟悉，都可以話係唔熟悉。
熟悉，係因為有親人係香港人，由細細個開始，幾乎每一兩年都會去香港同屋企人團聚。所以由細到大，我都可以話係去過成十幾廿次HK。細細個就已經記得，喺海港城落咗船之後，要搭邊架巴士、邊班地鐵去阿嫲屋企。
唔熟悉，係因為我落咗香港，除咗行下沿途嘅商場，或者去旺角觀塘買波鞋之外，基本上都只可以踎喺阿嫲屋企，好少真係認真行下咁大撻香港地。以前真係有些少羨慕我一啲同學，落香港可以成日自己周圍行。
其實不過我都唔可以話冇乜點行過香港，香港好多地方我都係經常行，但係係喺父母親戚嘅陪同之下。唔係話有父母親戚一齊行街就唔好，實際上仲有幾多好處，例如話唔使自己記路，唔知行邊條路自然會有人帶住；行街睇啱嘢，有時仲唔使自己畀錢……但係，明嘅人自然會明，同父母親友一齊行街嘅感覺，相比自己一個人行街嘅感覺，係完全唔同嘅。
可能喺香港嗰邊嘅親人，平時見我比較少，所以喺佢哋嘅眼中，我成長嘅速度比較慢。可能喺佢哋印象中，我仲係嗰個十年前，落到香港乜嘢都唔識，凈係識得去搵喺青衣住嘅表哥屋企玩PSP、影相擺pose凈係識得扮超人交叉手發射光線嗰個細蚊仔，冇意識到，哇，原來已經咁大個仔啦。搞到我宜家都有咗思維慣性，形成咗習慣，好少話想自己行香港。
但係佢哋真係好錫我。
1歲嗰陣，就帶我去海洋公園玩。真係得一歲。我老豆玩遊戲掟波，贏咗一隻頭獎大公仔畀我，隻公仔仲大隻過我，有相為證。（宜家搵唔到張相，清明放假返屋企搵到張相會影低放上嚟畀你哋睇。）
仲有細個嗰時，會成日帶我去尖沙咀嘅香港科技館玩。最記得係入面有個波，好大一個，鐵波？放隻手上去會有模擬嘅電流，細個時覺得好有趣。
我一直對香港市井文化抱有十分濃厚嘅興趣。港產片由細睇到大，睇到就快識做，而入面最吸引我嘅就係香港地嘅本土市井氣息同埋文化。相比于身為國際大都會、經濟金融中心嘅港島、中環，我更加喜歡充滿人文味的深水埗、九龍塘。
我老豆話我阿爺生前好中意去一個地方，鴨寮街。喺深水埗。
鴨寮街出名舊電器一條街，但係佢又唔單祗係賣電器。佢通街都係舊嘢同埋假嘢，舊電器舊數碼產品舊書舊碟舊傢私舊衫舊鞋，假古董假珠寶假手錶（雖然都有好多堅嘅二手嘢）。
好似我啲咁嘅老人家就最鐘意去鴨寮街呢啲地方。因為真係可以畀我喺度淘到好嘅舊嘢。（我份人對與哩啲舊物總係有一種難以割捨嘅情懷）哩度啲二手Nokia手提電話，上世紀留落嚟嘅二手cd、黑膠唱片，真係令我覺得好感興趣。
可能我阿爺生前成日喺呢條街流連，都係因為相同嘅舊物情結。
我老豆同我一齊去鴨寮街，去搵阿爺當年行呢條街嗰陣時嘅感覺。
層層疊疊嘅舊書、舊VCD、DVD。
哩張係我估計焦距之後，將相機掛喺心口前面一邊行一邊偷拍到嘅。
鴨寮街好多咁樣嘅老人家喺度徘徊。我諗如果阿爺宜家仲在生，應該亦都同我眼前呢位老人家一樣，係鴨寮街上眾多蒼老但仍對生活充滿熱誠的靈魂之一。
哩個男人喺著裝上睇，應該係一位印巴籍人仕。佢啱啱喺地攤買咗個耳機，畀我抓拍到。
深水埗好多巴基斯坦人。唔單止深水埗，其實成個香港嚟講都係好多印巴人。我聽講原因係早期嘅印巴同香港都屬於英國殖民地，兩地嘅人民可以互相來往但係唔使簽證，亦都可以在此定居。
講到香港嘅印巴人，有一個不得不提嘅地方就係尖沙咀嘅重慶大廈。重慶大廈入面有幾千個住客，超過一半都係印巴人，同埋其他南亞裔人士、非洲人。重慶大廈可以講話係“少數民族”在香港的“唐人街”。佢哋有自己嘅生活、社交圈子，除咗平時買嘢消費、返工放工，基本可以同香港人冇任何接觸。重慶大廈係佢哋嘅一座城市，一幢城堡，一片孤島。
佢哋喺香港，某種程度上都可以被稱為弱勢群體。
哩張影得好急，冇對好焦。我想影嘅係呢位阿伯揀地上嘅工藝品嗰陣嘅樣。（我對緊焦嘅時候佢突然企咗起身，我啦啦霖㩒快門）
哩位阿姨係呢個地攤檔嘅檔主。我見佢對襪著得咁特別，就影低咗呢幅相。
影完哩幅相之後，佢發現咗我。佢即刻同我講：“靚仔，唔該唔好影相。”我話：“唔好意思。”
哩啲屬於香港底層嘅小販，對鏡頭都比較敏感。佢哋有強烈嘅自我保護意識，怕對自己不利。怕發生啲咩差錯，都會對本來就唔寬裕嘅生活造成大打擊。
因為，佢哋唔可以失去任何嘢。
人流不息嘅鴨寮街，哩位阿伯喺街邊打鼓。
佢用一個舊音響，好大聲咁播緊一首譚詠麟，用自己嘅方式去打鼓合奏。
其實佢見到我喺度影佢，但係佢好似好享受畀人影。
佢對住我笑咗笑。
鴨寮街街邊通街都係哩啲用行李箱裝住一大堆雜物嚟賣嘅走鬼。
有時我唔明點解啲咁舊咁殘嘅零星瑣碎之物會有人買。
但係，買嘅人都有屬於佢哋自己嘅原因，賣嘅人都有賣哩啲嘢嘅原因。
殘破感。
舊cd舊黑膠碟檔。
喺呢個地方，祗要你畀心機去坐喺度慢慢搵，肯定會有收穫。
嗰個晏晝我喺度買咗兩隻黑膠，三隻cd。
“黑膠統一廿蚊一隻！cd一百蚊三隻！”
……
鴨寮街，講住咁多先。希望有一日你哋可以去睇下。
po幾張無關鴨寮街嘅相。
St. Teresa's Hospital
聖德肋撒醫院
2007年我細佬喺哩度出世。
搭巴士經過影低半邊。
舊屋邨走廊窗口。
電梯隔離墻嘅標語。
哩張唔知點解漏光，漏到成張變成紫色。
但係又幾好睇嚄，我諗。
成日都有驚喜畀我，可能哩個就係玩菲林嘅樂趣。
香港獨有的味道，係香港製造。
有機會去香港再影多幾卷，會再寫關於HK嘅推文。
因為好多嘢，真係講唔曬，亦都未曾諗好要點講好。
期待一下。
香港製造——許冠傑
希望你哋鐘意。
早唞：）